Literatur

Hamlet in Meidling

Von: Beppo Beyerl | 3. April 2020, 13:10

Hamlet sinniert in Zeiten wie diesen im Unterleiberl in der Meidlinger Wohnung

Hamlet
Eam oder mi, wem drah i ham?
Weil is des wiff, daß i bei jeden Furzer von eam kusch
Und wie a Lamperl meine Patschn streck?
Wars do net wiffer, wann i den Wappler von mein Onkel
Mit aner Black und Decker seine Nerven putz?
Wann i des aber drah und immer weiterdrah,
Dann kennt i bald die Patschn flechtn,
Die i dann ewig streckn kennt.
Wäu Hamdrahn, Büseln, aus der Panier für immer Schmeißn,
Sag is des alles?
Kasweiß so wie im Hirn die Blasen
Statt zündat so wies frische rote Bluat!
Für immer kennt i aus dem Schneider sein
Wann i mei allerletztes Bankl reiß!
Und wann i überd Wampen stad die Pratzn falt,
Dann fallert mir zu kane Wickl mehr a Muckser ein.
Wann i des aber drah und immer weiterdrah,
Dann wär i ja nix anders als a Weihnachtsgans
Fürd Ratzen und fürd Würmer
A gscheckert grippter Osterstriezel für die Maulwürf
A Wiener Schnitzel für die Madn
A Klostersuppen für die Läus die hacknstad grad sind!
Und net einmal desinfiziert tät i fürs gfressnwerdn noch werdn!
Na, i glaub i scheiß aufs sterbn,
Weil besser ists den Onkel zu beerben.
I steck mir schnell a Browning ei
Und schiaß ihm dann das Hirn zu Brei.

Übersicht:
Literatur

Übersicht:
Ö1 Kulturforum