Augn zua

Von: Maria Janesch | 9. Dezember 2025, 19:52

Augn zua

Wo is mei Brülln schon wieder hinvaschwundn? I hob sie grod noch im Auto ghobt, um a Nochricht zu lesen. Ups, i waß schon, dafür sollt i stehn bleibm. Nojo, egal. Im Auto wor die Brülln noch do, hiaz is sie weg.
Also schnöll zur Optikerin. Bis die neie kummt, muass aa Reservebrülln her. Schen is sie nit, oba bessa als kane.
Zu Mittog im Restauron brauch i sie schon dringend. Warum san die Speiskortn lei imma so klan gschriebn? Guat, dass i zumindest die neie Billigbrülln mithob. Oba…OBA - WOS IS DES? I sig die Kortn und zugleich den Tisch drunta. Wie gibt’s denn sowos? Die Speiskortn is doch aus Leda, nit durchsichtig. I schau auf, sig durch die Wond direkt in die Kuchl. Sig die Köchin, a Küchnhülfe, an Obwoscha. Wie wüld reiß i mir die Brülln vom Gsicht. Puh, olls wieda normal.
Lei die Schrift is wieda zu klan, dass i sie lesn kennt. Vursichtig probier i’s nochamol, setz sie auf. WIEDA DES GLEICHE. I schau auf die Kortn, zugleich durch sie durch, durch die Wond, in die Kuchl. Glei reiß i mir die Brülln wieda oba.
Hmm, obwohl, vielleicht setz i sie mir doch wieda auf und durchschau die Wölt endlich bessa? Sie londet wieda auf meina Nosn. Pfoaa, wie schnöll und gschaftig die Leit orbeitn. Die Köchin hoackt die Kreita blitzschnöll, beobochtet dabei die Orbeit von de Ondarn gonz genau. Da Obwoscha ramt dos Gschirr außa, es klappat laut. Die Küchnhülfe schneidt die Zwiebl, sie want dabei, die Nosn tropft, die Tropfn folln aufn Salot. Wääh, moch die Augn zua, gnua gsegn.
Gonz durchanonda, nimm i die vaflixte Brülln ob, i mog nix mehr essn, wüll nur noch ham.
Erleichtert kumm i in mei Wohnung, loss mi aufs Sofa folln. Die Brülln loss i liaba im Etui. Noch a por Minutn entsponn i mi, greif zum Handy und ruaf mei Freindin on, de glei daneben wohnt. I wüll ihrn olls zugleich azöln, es spruadlt glei so außa, mei Freindin vasteht nix von mein Kaudawölsch. Am bestn zag i ihr anfoch, wos de Hexenbrülln mocht.
Wort amol, vielleicht wor dos nur im Restauron so, i probier liaba nochamol. Mutig setz i dos vamaledeite Ding auf - und reiß sie mir so narrisch vom Gsicht, dass sie am Bodn klescht und zabricht. Hob i DES wirklich gsegn? Is mei Freindin echt mit MEIN Monn im Bett glegn, bade nockat? Moch die Augn zua, am bestn nie mehr auf.
Af amol follt mir mei klana Revolva ein, den mir mei Monn amol gschenkt hot - fia den Foll da Fälle. HIAZ IS SOWEIT. I hol die Woffn - und den Reserveschlissl von da Freindin-Wohnung - und ziag durch.

Lei guat, dass die Brülln zabrochn is. Olls mecht i gor nit wissn.

09.Dezember 2025
Maria Janesch

Übersicht:
Schließ die Augen