Mensch, Tier und Alltag

Muettersprachunterricht

Von: Annemarie Regensburger | 9. März 2022, 11:59

Lyrischer Text

Muetersprachunterricht

Kinder- ih mueß enk hein fragen
Kinder- kennts ejs mir nouh sagn
was a Solder, was a Tscholder
hängt an Soal a Firtig drou?
Isch hein Werchtig ober Erchtig
fangt an Pfinztig d’Woche ou?
Isch in Schnarfer drei a Raftl
oder habts an Zegger mit?
Seids hein sierig oder griehrig
oder habts hein lei a Gstritt?
Seids hein lepprig oder miehlig
oder gnappets mitn Grind?
Tiets hein tarlen oder taggn –
tickn kennts ejs ja so gschwind.
Habts an Zuber und a Rumpl
wissts ejs, was a Grantl isch
leijt a Gatze oder Mueser
oder Gaggelen an Tisch?
Isch der Wiesbam keif oubundn
oder hat die Dirn enk pluijt?
Ja, dear Track geit oft a Tachtl
wenn’sn ouh darnach oft ruijt.
Seids derzagglt oder gregget
gnigget darfts ejs gwieß nit wearn
inser Nale isch zwar tearisch
gahwigs Zuijg tuet se derhearn.
Ja, dejs Nale und dear Nene
tien dia Wearter gwieß verschtiahn.
Kinder- ejs darfts nie vergessn :
Ouh die Muetersprach isch schian.

Annemarie Regensburger

Übersicht:
Mensch, Tier und Alltag

Bundesland:
Tirol

Übersicht:
Akustische Bodenproben